Azaroaren 6an, Euskadi Lagunkoia Berria programak jarraipen-bilera egin zuen Gasteizko BIZAN Los Herránen, Activa tu Barrio ekimenaren aurrerapenak ezagutzeko eta esperientziak partekatzeko. Ekimeneko adinekoek, BIZANeko profesionalek eta Eusko Jaurlaritzako Osasun Sustapeneko ordezkariek hartu zuten parte.
Topaketan, auzokoen arteko harremanak estutzen, nahi gabeko bakardadeari aurrea hartzen eta eguneroko espazioak irisgarriago eta lagunkoiago bihurtzen laguntzen duten hainbat ekimenen berri eman zuten.
Erakunde publikoak ere, Establezimendu Lagunkoiak
Topaketan nabarmendu zuten Arabako Osasun Publikoko Zuzendariordetza eta Lurralde Ordezkaritza Euskadi Lagunkoia Berria programako Establezimendu Lagunkoien sarean sartu direla.
Activa tu Barrio ekimenaren barruan sortutako egitasmo horri esker, saltokientzat prestatutako prestakuntza egokitu dute herritarrei arreta ematen dieten erakunde publikoetan ere erabiltzeko.
Sentsibilizazio-saioen eta autoebaluazioaren bidez, bi erakundeek beren instalazioen irisgarritasuna aztertu dute, baita mugitzeko, ikusteko edo entzuteko zailtasunak dituzten pertsonei ematen dieten arreta ere. Azterketa horri esker, zerbitzu lagunkoiagoak eskaintzeko hobetu daitezkeen alderdiak identifikatu dituzte.
Esperientzia urrats garrantzitsua da lagunkoitasuna tokiko saltokietatik harago zabaltzeko. Gainera, beste erakunde eta lurralde batzuetan ere bide bera egiteko aukera erakusten du.
Adinekoak, beren auzoetako eragile aktibo
Bileran, Activa tu Barrio ekimenaren lana ere nabarmendu zuten. Ekimenak adinekoen parte-hartze aktiboa sustatzen du, beren ingurunea hobetzeko.
Besteak beste, ibilbide seguru eta lagunkoiak sortu dituzte, belaunaldien arteko jarduerak eta paseo osasungarriak antolatu dituzte, eta saltokiekin sentsibilizazio-ekimenak egin dituzte, bakardade-egoerak antzematen eta prebenitzen laguntzeko.
Parte-hartzaileek azaldu zuten esperientzia horiek harremanak sortzeko, aktibo jarraitzeko eta komunitatearen parte sentitzeko balio dietela. Topaketan esan zuten bezala: «Auzoa aktibatzeko, gu geu aktibatu gaituzu lehenengo».
Saioan, espazio publikoen irisgarritasunarekin eta eten digitalarekin lotutako beharrak ere aztertu zituzten, baita adineko batzuek baliabide eta jarduera komunitarioetara iristeko dituzten zailtasunak ere.
Elkarlanean, komunitate lagunkoiagoak
Bilerak agerian utzi zuen adinekoen, BIZAN zentroen, saltokien eta inguruko gizarte- eta osasun-eragileen arteko elkarlanaren garrantzia.
Erakunde publikoak Establezimendu Lagunkoien sarean sartzea bezalako esperientziek erakusten dute lagunkoitasuna eguneroko bizitzako esparru gehiagotara zabal daitekeela pixkanaka. Horrela, komunitate irisgarriagoak eta inklusiboagoak eraikitzen dira, adinekoen ongizatearekin konprometituak.